शनिबार ललितपुरको गोडावरी सनराइज कन्भेन्सन सेन्टरमा सम्पन्न ३०औँ संस्करणको मिस नेपाल सौन्दर्य प्रतियोगितामा लुना लुइटेलले मिस नेपाल वर्ल्ड २०२५ को ताज पहिरिन्।
यस वर्षको प्रतिष्ठित प्रतियोगितामा चार मुख्य उपाधि प्रदान गरियो—मिस नेपाल वर्ल्ड, मिस नेपाल कोस्मो, मिस नेपाल इन्टरनेशनल र मिस नेपाल अर्थ।
यसैअन्तर्गत, दीपशिखा नेपालले मिस नेपाल कोस्मो उपाधि जितिन्, जुन पहिलो पटक मिस नेपाल प्लेटफर्ममा मिस कोस्मो फ्रेन्चाइज समावेश गरिएको हो। सन् २०२३ मा स्थापना भएको मिस कोस्मो प्रतियोगिताको पहिलो संस्करण सन् २०२४ मा भियतनाममा आयोजना गरिएको थियो। त्यस्तै, उरुषा भण्डारी मिस नेपाल इन्टरनेशनल घोषित भइन् भने, सोनी घले मिस नेपाल अर्थ बन्न सफल भइन्।
मुख्य उपाधिहरुका अतिरिक्त प्रतियोगीहरूलाई बौद्धिक क्षमता र व्यक्तित्वमा आधारित गरी १४ वटा सब–टाइटल पनि प्रदान गरियो। श्रुति महर्जनले दि काठमाडौं पोस्ट मिस इण्टेलेक्चुअल उपाधि हात पारिन् भने भण्डारीले मिस पपुलर च्वाइस र मिस टाइमलेस एलिगेन्स दुवै जितिन्। आरती थापाले मिस हेल्दी स्किन, जगदिश्वरी शाहले मिस ग्रीन भिजनरी, र प्रगीका क्षेत्रीले मिस कनफिडेन्ट उपाधि प्राप्त गरे।
नव–मुकुटधारी मिस नेपाल वर्ल्ड लुइटेलले मिस DHI उपाधि समेत जितिन्। स्मृति श्रेष्ठलाई मिस फोटोजेनिक र फेस अफ द इयर उपाधि दिइयो भने निलिमा पाण्डे वुमन विथ द विङ्स घोषित भइन्। प्रियंका थापाले मिस प्रिस्टिन जितिन् भने श्रिष्टि कुमारी तामाङले मिस ब्युटी विथ ए पर्पस पाइन। मिस नेपाल कोस्मो दीपशिखा नेपालले मिस एम्पावर्ड च्वाइस पनि जितिन् भने सैच्छा थापाले मिस ब्यूटिफुल हेयर हात पारिन्।
प्रतियोगिताका निर्णायक मण्डलमा दि हिडन ट्रेजरका अध्यक्ष अजय रत्न स्थापित, मिस नेपाल वर्ल्ड २०१८ श्रृङ्खला खतिवडा, हिमालय टेलिभिजनका अध्यक्ष श्याम कँडेल, अभिनेत्री आना शर्मा, कान्तिपुर मिडिया ग्रुपका सिइओ महेश स्वर, अरेटा पब्लिक रिलेसन्सका सिइओ रुचि पाण्डे, सिमेक्स इन्कका सिइओ साहिल श्रेष्ठ, मिस नेपाल अर्थ २०१८ प्रिया सिग्देल, मिस्टर नेपाल २०२३ समर्पण जङ कार्की, डा. श्रृस्टी श्रेष्ठ प्रजापति र डिजाइनर मनिष राई रहेका थिए।
New Miss Nepal Luna Luitel went to Australia when she was 17 years old & she studied Nursing there. She does research work in her field and later graduated in Public health & She is also a Certified Scuba Diver. Luna had the option to be Australian Citizen but she chose to keep… pic.twitter.com/yA6FN1Am2I
— Routine of Nepal banda (@RONBupdates) August 31, 2025
फाइनलमा १२ जनाबाट अन्तिम चारजनालाई छनोट गरिएको थियो। सरोगेसीदेखि लिएर जलवायु परिवर्तन र कृत्रिम बुद्धिमत्तासम्मका विषयमा प्रश्न सोधिएको थियो। अन्तिम चार प्रतिस्पर्धी लुइटेल, भण्डारी, घले र नेपाललाई एउटै प्रश्न सोधियो—“यदि तपाईं सौन्दर्य प्रतियोगितासम्बन्धी एउटा दृष्टिकोण परिवर्तन गर्न सक्नुहुन्छ भने त्यो के हुन्थ्यो र किन?”
२६ वर्षीया लुइटेल, जसले नर्सिङ पृष्ठभूमि भएकी र हाल अस्ट्रेलियाको सिड्नी विश्वविद्यालयमा सार्वजनिक स्वास्थ्यमा स्नातकोत्तर गरिरहेकी छिन्, उनले अन्तरंग सौन्दर्य र उद्देश्यलाई महत्व दिनुपर्नेमा जोड दिएकी थिइन्। उनको भनाइमा, सौन्दर्य प्रतियोगिता केवल शारीरिक स्वरूपमा सीमित हुनु हुँदैन, बरु सामाजिक उद्देश्यका लागि योगदान दिने माध्यमका रूपमा स्वीकारिनुपर्छ।
लुइटेलले ‘सिक, कमाऊ र फिर्ता देऊ (Learn, Earn and Return)’ भन्ने सिद्धान्तमा विश्वास राख्ने बताइन् र आफ्नो उपाधिलाई समाजसेवा र सामाजिक मुद्दामा वकालत गर्न प्रयोग गर्ने प्रतिवद्धता व्यक्त गरिन्। उनले २०१५ मा मिस टिन नेपालमा फर्स्ट रनर–अप बनेर सौन्दर्य प्रतियोगितामा आफ्नो यात्रा सुरु गरेकी थिइन्।
अन्य विजेताहरूले पनि आफ्ना दृष्टिकोण प्रस्तुत गरे। मिस नेपाल कोस्मो नेपालले सौन्दर्य प्रतियोगिताले महिलालाई वस्तुकरण गर्ने होइन, बरु स्त्रीत्वको विविधता र सौन्दर्यलाई उत्सव मनाउने बताए। मिस नेपाल अर्थ घलेले सिर्फ बाह्य सौन्दर्य नभई बौद्धिकता र वकालत गर्ने प्लेटफर्म भएको बताइन्। मिस नेपाल इन्टरनेशनल भण्डारीले प्रतियोगितालाई परिवर्तनकारी क्रान्ति भन्दै यसले भविष्यका नेता उत्पादन गर्ने र समावेशी समाज निर्माणमा योगदान पुर्याउने धारणा राखिन्।
यस वर्षको मिस नेपालमा नयाँ ताज सार्वजनिक गरियो। २०१६ देखि २०२४ सम्म सुनका मुकुट प्रयोग भए पनि ३०औँ संस्करणका लागि श्री नटराज ज्वेलर्सले हीराका मुकुट डिजाइन गरेका थिए।
मिस नेपाल वर्ल्ड २०२४ आष्मा कुमारी केसीले आफ्नो ताज हस्तान्तरण गर्दा यो भूमिकाबाट प्राप्त अवसर र जिम्मेवारीप्रति आभार व्यक्त गर्दै व्यक्तिगत तथा व्यावसायिक जीवनमा यसले दिएको योगदानबारे स्मरण गरिन्।